Innen en oanen…

Dat wie in tûke set fan ús iisbaanferiening Mei-inoar ien. It moaie en kreaze iisbaanhokje ferhiere as bêd en brochje! Fansels moast der dan wol it ien en ’t oar oan barre, mar mei safolle handige doarpsgenoaten yn ‘e feriening wie dat goed te dwaan. It sjocht der dan ik hiel kreas út en al in protte gasten ha fan it smûke en gesellige hokje – wy kinne no better prate fan wentsje – gebrûk makke.

It hokje is doetiids solide en deeglik boud en de reedriders makken der by moaie winters tankber gebrûk fan. Omklaaie, even nei it húske en fansels om in lekkere flaubyt te heljen. In waarme woarst, in bakje kofje as âlderwetske poeiermolke. Ien fan it bestjoer stie dan achter it iepen rút mei de grutte tsjettels waarme dranken dy’t prottelen op it vintage gasstel… Winterwille op syn doarpsk, mei in muzykje op ‘e achtergrûn…

Sjoen it opwaarmjen fan de ierde is der de lêste jierren net safolle gebrûk mear makke fan it hokje. Heechút in pear dagen yn’t jier. En wat is it dan moai dat jo sa’n hokje dochs op in oare wize nuttich meitsje kinne. Dan hat de iisbaanferiening ek noch wat ynkommen…

In (eks) doarpsgenoate beheard de boel. En mei in tal oare B&B’s makket se reklame op har webside foar dit daaldersk plakje: Mei-inoar ien te Hantum…

Mar no komt it…

It liket krekt as hat it iisbaanhokje Mei-inoar ien besite hân fan it telefyzjeprogramma Bed and Breakfest. Jimme kinne dat wol, dan geane der trije stellen op besite by inoars Bêd en Brochje en dan meie se harren wurdearring blike litte troch it mear as minder beteljen dan de fraachpriis. De Bed en Breakfest dêr’t it meast boppe de fraachpriis betelle is, wint de ôflevering. Fêst punt is dat de behearders by de ôfsluting fan de útfanhuzersdagen altiten freegje (nei’t sa fansels allegearre kompliminten krigen ha) hawwe jimme noch tips??

En dêrmei doele se op saken dy’t de gasten by harren ferbliuw mist hawwe. Sa as in stopkontakt by it bêd as in lampke boppe de spegel en mear fan sokke ûnnoazele saken...

Mar ja, it iissbaanhokje – ekskuzes – iisbaanwentsje is sa kreas dat der fansels neat te melden is. Alles is perfekt. No ja, ien ding dan… Dy stakkert gasten brekke harren de tonge oer de moaie namme. Mee-inoorin? Maaiorder-een? Matinoor en? Help! Dochs in minpuntsje. En wat betekent dit eigenlijk? What is de meaning of Meeeinoar-one?

Nuver, mar de beheardster koe dizze wurdbrekkerij net langer oanhearre en se hat besluten om de namme te feroaren yn Inn-Hantum. Meikoarten komt it ek sa op har webside te stean.

Net bêst wol?!

Wêrom tajaan oan dizze nukken fan de gasten? It is dochs hiel ienfâldich om in moai dokumint mei útlis te meitsjen en dat op te hingje yn it hokje? (Ekskuses, wentsje) Wêrom de moaie Fryske namme ferkwânselje oan de waan fan dizze dei. De gasten jouwe harren bern de meast frjemde nammen mei letters dy’t fanwegen de kreativiteit der net mear by hearre, mar se stroffelje oer in moaie Fryske namme dy’t de histoarje fan dizze klup en dit hokje (ekskuzes, wentsje) sa moai werjout. Mei-inoar ha wy de skouders derûnder set om dit foarelkoar te krijen!

Soene de gasten at se bygelyks yn Frankryk binne, harren ek fernuverje oer bysûndere Frânske nammen? Fansels net! Dat heart by dat lân, dat hear by dy kultuer! Krekt sa as Mei-inoar ien. Dat heart by Hantum, dat heart by Fryslân, dat is de skiednis fan dit geboutsje. Dy namme heart der gewoan by! Dat kinne jo útlizze, dat kinne jo beskriuwe. Wês grutsk op jo taal! En striel dat út. Lit de gasten harren mar fernuverje oer ús moaie Frysk. Dat makket it plakje allinne mar uniker…

Hebben jullie nog tips? En dan sjogge jo de eigeners tinken: en dêr dogge wy lekker neat mei… En sa moat ús beheardster dat ek dwaan. Betizing? Spitich dan, mar ik soe mar ris goed de beskriuwing lêze. Dat is mijn oordeel, en hier moet u het mee doen…

En at se net om lyk wolle? Dan sette wy de baanfeimasine (want dat moast fan need in oar plak ha) wer midden yn it hokje (ekskuses, wentstje). Dat sil de stammerjende gasten leare. Wy binne hjir Mei-inoar ien, en as jo dat net begripe wolle, faie wy jimme sa de keet út mei jimme neiteam Annamijn, Milo en Pipa…