Doarpsfeest…

Ik lies yn de hûs-oan-hûskrante dat ús feestkommisje de fergunning foar it twa jierlikse doarpsfeest oanfrege hat. Eins hie dat feest plak fine moatten yn 2021, mar it is wol dúdlik wêrom dit de foarige kear net trochgien is. Moai dat de kommisje fan plan is om it dit jier wol te organisearjen, wy binne der wol wer ris oan ta…

Mar as der dan noch hieltyd maatregels jilde? Moatte wy it feest dan wer skrasse? It is net te hoopjen. Dêrom doch ik hjir it tal foarstellen wêrmei it feest ûnder alle omstannichheden trochgean kin. Want feest sille wy fan’t jier fiere!

Wy begjinne mei de sinteraasje. Foarôfgeand oan it feest komt de kommisje der by lâns mei de donaasjelist. Der by lâns kin noch hieltyd, mar der wurdt net oanbelle. De kommisjeleden triuwe in stinsel troch de bus mei dêrop in QR-koade.  (Wol dúdlik derby skriuwe dat it in QR-koade foar in bydrage foar it doarpsfeest oanbelanget, want QR-koades lizze gefoelich hjoed oan de dei…) Dizze koade ferwiist nei de bank en de doarpsgenoaten kinne sa, alhiel op ôfstân it jild oermeitsje. Fansels kin de koade sa oanpast wurde dat der altiten €150,- oermakke wurdt, mar dat is net oan te rieden. Dan helje wy it feest net iens…

Feesttinte in slachje grutter. Mei sa’n moai sportfjild ha wy genôch rûmte, dat dan kin der by in besite oan de tinte genôch ôfstân hâlden wurde. Fia de app kinne der drankjes besteld wurde en dy steane dan oan’e ein fan de bar klear om ôfhelle te wurden. Fia dyselde app wurde der fan te foaren finkjes besteld en betelle en by elk drankje wurde der finkjes fuorthelle. Dit konsept is noch net alhiel wetterticht, mar wy hawwe noch wol even tiid om it te perfeksjonearen. 

Ek kinne de lju fan de betsjinning der foar kieze om de feestfierders Tikkies te stjoeren. Yn de kantine op it sportfjild wurdt in Tikkiesintrum ynrjochte en elke kear as der in bestelling ôflevere is, giet der in gjalp rjochting dit Tikkiesintrum: Tikkie foar Kees, 17 euro…! Foar notoare ynnimmers stiet der standert in Tikkie klear dy’t mei ien klik op it skerm de feesttinte ynjage wurdt. Foar dy pear doarpsgenoaten dy’t net in tûke telefoan ha, is der yn dat selde Tikkiesintrum in kassa oanwêzich.

Muzykgroepen dat kin fansels ‘gewoan’ trochgean, dy sitte faaks yn harren eigen muzykbubbel. Mar net elkenien is tagelyk wolkom, wy ferdiele de jûn yn trije ferskate bubbels. Earst de bern oan’t 21:00 oere en fan njoggen oere ôf de pakes en beppes. Dy kinne harren dan even útlibje oan’t 23:00 oere. Dêrnei it âlde spul nei hûs om rûmte te meitsjen foar it jongfolk dy’t de jûn folmakket en ôfslút. Foardiel: pakes en beppe kinne moai oppasse! Fansels alles op oardel meter. Eventueel kinne wy foar polonêze-achtige aktiviteiten fan dy swimslangen klear lizze, sadat wy dochs rigen meitsje kinne. Wy kieze foar swimslangen om’t dy licht, sacht en sa’n oardel meter binne. Mocht it dan út ‘e hân rinne, dan falle der net al te folle ferwûne doarpsgenoaten.

Foardiel is ek dat de muzyk de te spyljen nûmers kreas yn sjenres yndiele kin. Earst de berneferskes mei Dikkertje Dap, Kabouter Plop en de Zevensprong, dan de gouwe ouwe mei de Selvira’s, Corrie en de Rekels, Willy Alberti en de Wiko’s en de lêste oerkes de healwize muzyk fan dat moderne rap-spul…

Ek ha ik noch wol wat oare moaie aktiviteiten dy’t oerdei hâlden wurde kinne. In fytstocht is fansels altiten goed. Meielkoar kofjedrinke en pankoek ite kin moai bûten en mooglik kin elke famylje harren eigen pankoeken bakke en sels in termosflesse mei kofje meinimme. Stroopflessen en poeiersûker kin de kommisje der wol mei karkes by lâns bringe…

Dan noch wol in aardige aktiviteit foar in bûnte jûn: doarpsgenoaten riede. Fanwegen de mûlkapkes rinne doarpsgenoaten elkoar straal foarby wylst wy wûn binne om elkoar te groetsjen. Mar ja, wy werkenne elkoar net mei dat spul foar de mûle. Sa sei in bekende doarpsgenoat tsjin my, doe’t wy tegearre foar de baly by de húsdokter stiene en ik har groete: Ik sjoch it even net… Mar doe’t ik it mûlkapke nei beneden die, pûkere se wakker om’t sy dat net mei de earste kear sjoen hie. 

Fan sokke misferstannen kinne wy op it feest moai gebrûk meitsje. De strjitten sitte byelkoar oan in tafeltsje, nei’t se nei in selstest tagong krigen ha ta dit spektakel. Papier yn ‘e oanslach en om bar ferskine der doarpsgenoaten mei mûlkapkes foar op it poadium. En om’t it feest is, meie se harren ek healwiis ferklaaie. Dat makket it allinne mar hilarysker. De spilers fan de strjitte mei de measte punten ûntfange in spesjaal makke mûlkapke fan kreaze en djoere stof, mei it opskrift: Op dit feest hiene wy de grutste mûle!

Fansels wurdt it feest ôfsluten mei in tsjerketsjinst op de snein. Dizze kear dogge wy dizze tsjinst alhiel online. De tsjerke hat moai ark om soks mooglik te meitsjen boppedat kinne sy der mei omgean, dat sa’n online tsjinst wurdt foar elkenien in makkie. Foar de sfear hâlde wy it wol yn de feesttinte, mar mei safolle technyske minsken yn it doarp moat it oanlizzen fan de technyk en de útstjoering in peace of cake wêze.

Wy meitsje de tsjinst ynteraktyf troch gebrûk te meitsjen fan in spesjale app-groep. Under de tsjinst kinne de sjoggers dan moai reagearje op fan alles en noch wat. Reagearje op de preek, op de muzyk, de ferskes, op it byld it lûd en gean sa mar troch. De tsjerkeminsken binne wol wat wend, want yn de lockdowns wiene sokke ynteraktive tsjinsten hiel gebrûklik. 

Om de doarpsgenoaten op skerp te setten, sette wy by de earste wurden fan de foargonger it lûd út, sadat de tinttsjinstgongers fuortendaliks reagearje kinne mei sokssawat as: ik hear neat, it lûd stiet wol tige sacht as it byld dat stiet stil… Om alhiel yn de feeststimming te bliuwen krije de earste reagearders konsjumpsjefinkjes tastjoerd. (Dy’t se dan wer foar de kollekte brûke kinne…) Ek kin der foar keazen wurde om de orizjineelste reaksje te beleanjen mei in publykspriis.

Dan as lêste noch even in tip foar de bekende bruorren dy’t harren altiten sa moai útlibje yn de optocht en elk feest wer prachtich foar it ljocht komme mei in orizjinele kreaasje. Dit kear kinne jimme moai in mobile priklokaasje meitsje. As sa as jimme wolle: in prikbus. Foar dy prikken kinne jimme fan alles brûke. Priklimonade, satéprikkers, rommelprikkers as punêzes. Sa kinne jimme op ludike wize doarpsgenoaten dy’t noch net faksinearre as boostere binne dochs moai ynintsje. Sels kinne jimme jim hielendal ferstopje yn sterile skelken, plestik kappen en rubberen moffen. Foardiel is ek dat jimme net werkend wurde en jimme de jûns by it spultsje doarpsgenoaten riede, moai de haadakt foarmje kinne.

Hawar, der is fansels noch folle mear te betinken, sa ha wy it noch net iens oer fierdere ynfolling fan de fersierde weinen hân, mar ik wol fansels ek net it gers foar de fuotten fan ús kommisje weimeane. Ik tink dat se sels wol sa kreatyf binne om in koronaproof feest op poaten te setten. Lit dit stikje mar in earste oanset wêze, want sa as ik al earder sei: wy bin wol wer ta oan in feestje!