It is no -
|
Hoe is't? Buorman kaam fan 'e wike thús mei syn ûnbidich grutte karavan. Dan is it altyd panyk yn 'e strjitte, want wêr set buorman dizze wenwein del? Hy mei him oeral graach delsette, behalve by himsels op 'e oprit, hoewol hy dêr skoan past. It fêste plakje wie beset en dêrom hie buorman him wer in hiel moai plakje jûn... Om't wy harren al in hiel skoft net sjoen hienen, makke Wilma út fatsoen even in lyts praatsje. Buorman fertelde dat sy trije wiken yn Spanje sitten hienen. Wêrfan twa wiken mei striemin waar! Doe't se wer nei Nederlân ta teagen, waard it hjir min waar en yn Spanje begûn de sinne te skinen. Wilma sei al tsjin him: 'Je had beter in Spanje kunnen blijven...' At no it waar as de karavan de achtergûn wie foar dizze fraach, litte wy mar oan de fantasy fan de lêzer oer. Wy ha in moai protte kaarten krigen foar us pearlen dei. Dat hienen wy net ferwachte. Alle lêzers dy't de muoite naam ha om hjir op ien as d' oare wize oandacht oan te jaan: tige tank! In moai begjin fan ús maaiefakânsje...
Pearel... Wy fiere hjoed ús pearlen houliksfeest. Mar om it foar elkenien wat makliker te meitsjen, binne wy der justermiddei op út west. Fansels nei Gaasterlân, want dêr ha wy 30 jier ferlyn ús houliksfeest ek fierd. Omdat de seal fan 30 jier ferlyn net sa woe as wy it woenen, binne wy yn Hotel Jans telâne kaam. It prachtige lokaasje mei gastfrije minsken en hearlik iten! Wy ha fan dit prachtige feest it tal foto's makke. Foar famylje binne dizze foto's te besjen yn it fotoalbum dy't mei de koade te iepenjen is. Understeande foto is wol hiel bysûnder, want dat wie in nuveraardich teekopke dêr't wy mei in stokje it teepûdsje yn hingje litte moasten. As soe it dochs earne oars foar brûkt wurde moatte, wy koenen der net alhiel achter komme. Mar de tee wie hearlik!
DTL - KCT In pear wiken ferlyn sei in jonkje út myn klasse tsjin my: 'Meester, we moeten 4 april in Hantum korfballen, komt meester ook?' Fansels, sa faak bart dat net en ik sei him ta dat ik dan komme soe te oanmoedigjen. Mar doe't ik yn Hichtepunten in programma fan DTL beseach, seach ik dat de Tytsjerksters net op 4 april, mar op 25 april komme soenen. It jonkje út myn klasse hie in fersin makke. Dy moandeis nei 4 april sei ik dan ek tsjin him: 'Nou, je wordt bedankt, daar stond ik dan met mijn mooie gele pruik, mijn groen gele shirtje op het sportveld, maar al wie er kwamen jullie niet!' Seit hy hiel ferheard: 'Hee meester, zulke kleuren hebben wij ook...' Mar hawar, hy moast bekenne dat it in fersin wie en dat it 25 april wêze soe! Hjoed wie it safier. Om tsien oere stie dizze supporter op it sportfjild de tsjinstanner oan te moedigjen. Wol wat nuver... Ik kom al noait by it kuorkebaljen te sjen en as ik dan kom, dan stean ik ek noch foar de tsjinpartij te juichen at hy troch de koer giet. De doarpsgenoaten kinne my dan wol wat dwaan! Lokkich begripe se de situaasje en se glimkje dan ek mar wat. Ach, lit him mar, foar dy iene kear yn 't jier dat hy hjir komt... Ik hie it fototastel ek mei en ik ha in pear plaatsjes sketten. As it goed is, moatte alle Tytsjerksters der op stean. It sil wol even konfrontearjend wêze foar myn doarpsgenoaten dy't dizze side regelmjittich lêze. Harren soe ik dan ek oanriede wolle om net op de folgjende link te klikken...  Der wie ris... Wat in aparte foto net?! Dizze foto hat alles te krijen mei de toanieljûn dy't wy justerjûn hâlden ha. Alle groepen moasten in lyts toanielstikje opfiere dat te krijen hie mei sprookjes. Mearkes, om it mar yn geef Frysk te sizzen... It wie in moaie jûn yn it doarpshûs fan Tytsjerk. In protte âlders en noflike bern. Wa't nijsgjirrich is nei mear foto's, gean dan nei de side fan ús skoalle. Wurksjops... Hjoed binne wy mei 11 kollega's net ta Ede west. Nei kongressintrum de Reehorst. Op dit kongres stie it kompjûtergebrûk yn it ûnderwiis sintraal. Om't wy net mei de trein woenen, ha wy twa buskes hierd. My waard frege oft ik ien fan dy buskes bestjoere woe. Gjin probleem mar op ien betinkst, it moast in VW wêze! Fansels wie dat mar gekheid, mar ik wie bliid ferrast, dat der fan 'e moarn in T5 foar my klear stie! 'Ha 'k spesjaal foar dy regele', sa sei ús kontaktpersoan. Prachtich! Hearlik en noflik nei Ede ta ride, de dei koe al net mear stikken. De keynote-sprekker (sa hjit in ynlieder hjoed de dei...) wie prachtich! En neffes Adjiedj Bakas stiet ús noch hiel wat te wachtsjen. Mar de worksjops wienen mar dreech en dy brochten net safolle nijs. No ja, oaren hienen wer oare wurksjops folge en sa meielkoar ha wy der as skoallen wer hiel wat ynspiraasje opdien. Oh ja, it iten wie wer super! (Mar dat mei ek wol foar sa'n tagongspriis...) De jûns hiene wy yn Easternijtsjerk noch in wurksjop. Dat hie neat mei boppesteand kongres te krijen, mar it wie wol hiel moai, dúdlik en nijsgjirrich. En eins wie dit de moaiste wurksjop fan de hiele dei! Dizze wurksjop krige it sifer acht, wyltst de oaren yn trochsneed in sân krigen ha. Want ek dat is modern, nei ôfrin in evaluaasjeformulier ynfolje...
Hjoed... Witte jimme it noch? De taakstraf dy't ik krigen hie fanwege it misbrûken van foto's fan twa fan ús koarleden? (Sjoch it weblog fan 25 febrewaris en fan 17 maart) Hjoed wie it safier en moast ik my melde om 09:00 oere...
Mar al wa't der wienen, ús twa advokaten net! Lokkich waard ik kreas ûntfongen troch harren sekretaresse en stie der in bakje kofje foar my klear, mar de hearen juristen moasten yn sân hasten opbelle wurde. It waard in noflik oerke! En fansels moast ik harren boat fan boppe nei ûnderen besjen. Hiel kreas en smûk. Mar dochs koe ik net ûnder de straf út! De boat moast nei bûten riden wurde en ik moast mei in rôler en in bakje ferve de hiele ûnderkant yn de ûnderwetterferve sette. It is slagge, mar freegje net hoe. No moat it boatsje noch in namme ha en om't ik it fermoeden ha dat de boat mear oan wâl lizze sil dan op 'e Lauwersmar, soe ik kieze foar De twee gebroeders (voor) Anker... Klik
hjir
foar mear foto's.
Freed... Freed moasten wy mei Klún & Knoffelhakke optrede op in brulloft yn Kollumersweach. Tige noflik en wer âlderwetsk ûntfongen! 's Nachts noch oanhâlden foar de blaasproef...  Tongersdei... Op tongersdei hienen wy in prachtige ekskursy mei de bern fan myn klasse nei Omrop Fryslân. Wy waarden tige freonlik ûntfongen en mochten it hiele gebou besjen. Wy sieten op in stuit sels yn de útsjoering. De bern mochten om de beurt op de knopkes fan de jingles drukke by it radiospultsje Tink Flink. Dat mochten jimme tongersdeitemiddei by it harkjen nei de radio wat ûngewoans heard ha, dat soe dat sa mar ús skuld wêze kinne... De stim fan Bear Boeloe kamen wy ek noch tsjin. Mar spitigernôch binne se yn Tytsjerk net sa Frysksinnich, dat de bern seagen wat fearheard doe't se dy aardige man 'lekker sliepe' brommen hearden...
Tiisdei... Op tiisdeitejûn ha wy ús fotofreon Geurt besocht. Hy wennet mei syn freondinne yn Surhústerfean en sil meikoarten trouwe. En om't hy altyd fergees foto's makket fan ús optredens, woenen wy ek wolris wat werom dwaan. Yn in e-mail wienen wy it folgjende ôfpraat (en dat wie ik allang wer fergetten) want it wie yn 2006 doe't wy ûndersteande e-mailwiksel hienen...
Geurt, Hendrik,
Beste Geurt, 1 Maaie o.s. is it safier! Fandêr dat wy it feest even trochprate moasten...
Heero...
Peaskekluskes... (2) Mar it resultaat mei der wêze! It hat in pear switdruppels koste, want fansels kloppe de de beskriuwing net. Tink ik... Mar de doar is stevich en hâldt tenei de hiele miggeklyk tsjin!
Alle bytsjes helpe, sei de man en hy friet in mich op...  Peaskekluskes... Mei sok moai peaskewaar binne der allegearre kluskes te dwaan: auto troch de Wasbeer, auto útsûgje (ja jimme lêze it goed...) en om in hordoar út. Wy ferwachtsje in bulte miggen mei dizze waarme sinnestrielen en dan moatte jo der klear foar wêze, ek al is it noch mar peaske. By Karwei wie hast net ien mear. It karweifolk wie de boel al oan it oprêden. Ik miende dat se oan't njoggen oere iepen wienen. Mar fanwege goed freed dienen se om seis oere de doarren al ticht. Man, wat in kar. Djoere doarren, roldoarren, basicdoarren, plusdoarren, lameldoarren. Ik hoegde mar in gewoane simpele doar, ien dy't miggen tsjin hâldt! De goedkeapste ha ik útsocht. En mei in hiele grutte doaze teach ik nei de kassa. Hoeden om my hinne sjen, want ik mocht fansels gjin modern karwei-guod omstjitte. Lokkich ha wy in bus, dat de hordoaze kaam yn goeie steat yn Hantum oan. Seach ik ek noch dat ien fan de autoljochten stikken wie. En dan moatte jo neffes de hantlieding nei it 'servicecentrum' wat it tichtste by is. Sels dwaan is der net mear by. Foar ien dy't yn in garaazje grut wurden is, is dat praat fan neat fansels. De motorkap stie dan ek al gau iepen. Moast miene dat ik dat foarelkoar krije koe! It woe mar net, ik koe de lampe der net útkrije. Ik wy by steat en gie yndie nei dat 'servicepunt' mar dan wie ynternet der ek noch! Even googleje, en it soe sa foarelkoar wêze. Mar it wie net te finen. Binne der op 'e hiele wrâld gjin mear minsken dy't de pit fan de koplampe der net útkrije kinne? Dan moast ik wol hiel ûnnoazel wêze... En dat wie ek sa. Want doe 't ik it nochris besocht, wie it samar klear. Sjonge, wat is it libben dan ienfâldich...Moarn de doar mar ynelkoar skroeve. Soe'k dan ek googleje moatte? Om't it net slagget? Neffes de doaze sit der in 'duidelijke montagehandleiding' by. Wy hâlde jimme op 'e hichte... Ald wiif... Dat wie in goed idee! In Peaskewurkshop hâlde. Tegearre mei in kollegaskoalle út it buordoarp. Wer ris wat oars as ynspeksjebesite, âlderjûnen as de 'luis in de pels' mei syn klompkes yn it spul... Om likernôch healwei achten kaam Wil, de wurkshopliedster mei in auto fol deade tûken, fioeltsjes, kronkeltûken, blombollen, izertried, oase, sateeprikkers en oar kreatyf guod de skoalle ynsetten. Wie sieten der hielendal klear foar. Om't it ûnderwiis al sa'n frouljusklup oan it wurden is, hienen ús direkteur en ik, sei de gek, harren opjûn foar dizze wurkshop. Sa eas sein: wer ris wat oars. Wy ha ús tige fermakke! De hiele jûn oan it nifeljen, oasekneden en oan it blêdste-op-in-izertried-setten west. Ik sei thús dat wy healwei tsienen wol wer klear wienen, mar pas om alve oere kaam ik mei in moaie griene Peaskekreaasje thús. Alteast ik fûn it moai... Doe't de jongste soan en syn freondinne lâns kamen om harren hûntsje nei in jierdeisfeestje wer op te heljen, spuide hy raar guod. Syn heit oan it blomkenifeljen? 'Ald wiif...!,' wie it ienichste wat hy útbringe koe. Lokkich hie syn freondinne mear each foar de kwaliteit fan dit stikje want neffes har soe dit yn 'e winkel samar 20 euro jilde moatte. klik hjir
foar foto's fan de jûn en it resultaat.
1 Aprilgrappen... Lokkich foel it juster wat ta. Gjin frjemde grappen, gjin losse fiters en gjin smoarge plakken op 'e jas. As it soenen dizze twa losse briefkes wêze moatte dy 't ik juster respektivelik op myn buro en achter de rutewiskers fûn.
|
Werom:
Us neefke is gek fan SC Heerenveen. Hjoed wie dan ek in grutte dei foar him, want hy mocht mei nei de wedstiid fan 't Fean tsjin Volendam. En omdat der in kaartsje oer wie, mocht ik ek achteryn de Audi mei nei it Fryske Haagje. It is dan moai dat jo relaasjes hawwe dy't oer in spesjaal plakje yn in stadion beskikke. As wiere VIP's sieten wy dan ek hearlik ûntspannen nei de wedstriid te sjen. It fuotbal koe better en it wie in nipte oerwinning, mar it wie in prachtige middei! Mieneke en Marten Remko, tige tank!
